మెగాస్టార్ చిరంజీవి పుట్టినరోజుకి ట్రీట్ రెడీ

హైదరాబాద్‌ : మెగాస్టార్‌ చిరంజీవి పుట్టిన రోజు సందర్భంగా ‘ఆచార్య’ టీం అభిమానులకు ఓ కానుక ఇచ్చేందుకు సిద్ధమైంది. మెగాస్టార్‌ చిరంజీవి, కొరటాల శివ కాంబినేషన్‌లో రూపొందుతున్న ఆచార్య సినిమా ఫస్ట్‌ లుక్‌ విడుదల కాబోతోంది. మెగాస్టార్ చిరంజీవి క‌థానాయ‌కుడిగా స‌క్సెస్‌ఫుల్ డైరెక్ట‌ర్‌ కొరటాల శివ ద‌ర్శ‌క‌త్వంలో భారీ చిత్రం రూపొందుతున్న విషయం విదితమే. శ్రీమతి సురేఖ కొణిదెల సమర్పణలో కొణిదెల ప్రొడ‌క్ష‌న్ కంపెనీ, మ్యాట్నీ ఎంట‌ర్‌టైన్‌మెంట్ ప‌తాకాల‌పై నిరంజ‌న్ రెడ్డి ఈ చిత్రాన్ని నిర్మిస్తున్నారు. చిరు, ఆగ‌స్ట్ 22న త‌న 65వ పుట్టిన‌రోజును సెల‌బ్రేట్ చేసుకుంటున్నారు. ఈ సంద‌ర్భంగా అభిమానులకు చిరంజీవి పుట్టిన‌రోజు గిప్ట్‌ను అందిస్తున్నారు. ఆగ‌స్ట్ 22 సాయంత్రం నాలుగు గంట‌ల‌కు ఈ సినిమా ఫ‌స్ట్ లుక్‌, మోష‌న్ పోస్ట‌ర్‌ను విడుద‌ల చేస్తున్న‌ట్లు నిర్మాత‌లు తెలిపారు. ఇదే విషయం మెగా పవర్ స్టార్ రామ్ చరణ్ కూడా తన ట్విట్టర్‌లో పేర్కొన్నారు. కాగా ఈ చిత్రానికి ‘ఆచార్య’ అనే టైటిల్‌ను అధికారికంగా ప్రకటించాల్సి వుంది.

ఇక దాదాపు సగం వరకు చిత్రీకరణ పూర్తి చేసుకున్న ఈ సినిమా షూటింగ్‌ కరోనా లాక్‌డౌన్‌ కారణంగా వాయిదా పడిన సంగతి తెలిసిందే. ఇక ఇప్పుడు పరిస్థితులు కాస్త చక్కబడటం సహా షూటింగ్‌లకు అనుమతి లభించిన నేపథ్యంలో త్వరలోనే చిత్రీకరణ పూర్తి చేసి సినిమాను విడుదల చేయాలని మూవీ యూనిట్‌ భావిస్తున్నట్లు సమాచారం.