వినుడు వినుడు రామ కథ…

రామకథ

వినుడీ వినుడీ రామ కథ

విన్న వారికిది పుణ్యమట

మదిలో బాధలు తొలుగునట

మనకు భాగ్యము కలుగునట..| విను |

తనయుల కోసం వగచి దశరథుడు

తలచి యాగమొకటి చేసేనట

యాగ ఫలమున నలుగురు పుత్రులు

మువ్వురు రాణులకు కలిగిరట… |విను |

అంతః పురమున దివారాత్రములు

పుత్ర ప్రేమలో మునిగి పోయిరట

ఎదుగు తున్న ఆ పుత్రుల విడచి

క్షణ మొక యుగముగ తలిచెరట..|విను |

యాగరక్షణ కై విశ్వామిత్రుడు

తనయుల పంపమని కోరెనట

విశ్వశాంతి కై వారిరువురికి

దివ్యాస్త్రమ్ములుపదేశించెనట..|విను |

పాషాణంగా మారినహల్యను

పాద ధూళియే పడతిగ మార్చెనట

ముని ఆనతి విని విల్లును విరిచి

సీతను పరిణయ మాడెనట,..|విను |

తండ్రి మాటను శిరమున దాల్చి

పిన తల్లి కోర్కెను తీర్చేనట

సీతా లక్ష్మణ తోడుగ కలిసి

రాజ్యము విడిచి వెళ్లేనట..|విను |

ముచ్చట పడిన బంగరు జింకను

పట్టి తెమ్మని సీత కోరేనట

వెడలిన రాముని కదలిక చూచి

అసరుడమ్మని అపహరించెనట…|విను |

అన్నదమ్ములు సీత జాడకై

అడుగడున అడవులు వెదికిరట

హనుమంతుగని వారిరువురు

వానర రాజు సాయము కోరిరట…|విను |

వానర మూక తో వారధి కట్టి

లంకా నగరమునకు కేగిరట

రావణు జంపి అమ్మను తెచ్చి

అయోధ్య నగరికి తిరిగి చేరిరట..|విను |

ధర్మ నిరతి లో రాముని మించిన

నాయకుడిలలో లేనే లేడట

ఆతని పాలనే లోకమందున

రామరాజ్యముగ వర్ధిల్లెనట…|విను |

-శేషం శ్రీనివాసచార్య,కరీంనగర్
Rtd GHM.