స్వచ్ఛభారత్‌లో తెలంగాణ హ్యాట్రిక్‌
హైదరాబాద్‌: స్వచ్ఛ భారత్‌లో తెలంగాణ హ్యాట్రిక్‌ సాధించింది. వరసగా మూడోసారి మొదటి స్థానాన్ని దక్కించుకుంది. జిల్లాల కేటగిరీలో కరీంనగర్‌ మూడో స్థానంలో నిలిచింది. స్వచ్ఛ భారత్‌లో భాగంగా ప్రతిఏటా కేంద్ర ప్రభుత్వం రాష్ర్టాలు, జిల్లాలు, బ్లాక్‌లు, గ్రామ పంచాయతీల వారీగా అవార్డులను అందజేస్తోంది. ఆగస్టు 8 నుంచి 15వ తేదీ వరకు నిర్వహించిన గందగీ ముక్త్‌ భారత్‌ (డీడీడబ్ల్యూఎస్‌) వ్యర్థాలను తొలిగించే కార్యక్రమాల్లో రాష్ట్రం అద్భుత ఫలితాలను సాధించింది. తెలంగాణ దేశంలోనే నంబర్‌వన్‌గా నిలిచిందని కేంద్ర ప్రభుత్వ డీడీడబ్ల్యూఎస్‌ డైరెక్టర్‌ యుగల్‌ జోషి తెలిపారు. జిల్లాల క్యాటగిరీలో కరీంనగర్‌ మూడోస్థానం దక్కించుకొన్నదని పంచాయతీరాజ్‌శాఖకు లేఖ రాశారు. అక్టోబరు 2వ తేదీన స్వచ్ఛభారత్‌ దివస్‌ను పురస్కరించుకొని ఈ అవార్డులను ప్రదానం చేయనున్నారు.
తెలంగాణకు స్వచ్ఛ భారత్‌ అవార్డులు వరించడంపై మంత్రి ఎర్రబెల్లి దయాకర్‌రావు సంతోషం వ్యక్తం చేశారు. ముఖ్యమంత్రి కేసీఆర్‌, మంత్రి కేటీఆర్‌ ముందుచూపుతో చేపట్టిన పల్లె, పట్టణ ప్రగతి, మిషన్‌ భగీరథ కార్యక్రమాల ఫలితంగానే వరుసగా మూడోసారి స్వచ్ఛ అవార్డులు లభించాయని మంత్రి అన్నారు. అవార్డులు ప్రకటించిన కేంద్రానికి ధన్యవాదాలు తెలిపారు.