అత్తారింట్లో భార్య‌ను ఎవ‌రు కొట్టినా భ‌ర్త‌దే బాధ్య‌త: సుప్రీం కోర్టు

న్యూఢిల్లీ: త‌న భార్యకు త‌గిలిన గాయాల‌కు తాను కార‌ణం కాద‌ని, త‌న తండ్రి వ‌ల్లే అలా జ‌రిగింద‌ని, త‌న‌ను అరెస్ట్ చేయ‌కుండా ముంద‌స్తు బెయిల్ ఇవ్వాలంటూ ఆ వ్య‌క్తి సుప్రీంకోర్టును ఆశ్ర‌యించాడు. అయితే కోర్టు మాత్రం అత‌ని వాద‌న‌ను తోసిపుచ్చింది.
పైగా అత్తారింట్లో కుటుంబ స‌భ్యులు, బంధువులు కొట్ట‌డం వ‌ల్ల భార్య‌కు గాయాలైనా దానికి భ‌ర్త‌దే బాధ్య‌త అని సుప్రీంకోర్టు తేల్చి చెప్పింది. పంజాబ్‌కు చెందిన ఓ వ్య‌క్తి వేసిన పిటిష‌న్‌పై విచార‌ణ జ‌రిపిన సుప్రీంకోర్టు ఈ తీర్పు వెలువ‌రించింది. అత‌ని ముంద‌స్తు బెయిల్ పిటిష‌న్‌ను కొట్టేసింది. 2020 జూన్‌లో లుధియానాకు చెందిన ఓ మ‌హిళ త‌న‌ను భ‌ర్త స‌హా అత్తింటి వారు హింసిస్తున్నార‌ని, తీవ్రంగా కొట్టార‌ని పోలీసులుకు ఫిర్యాదు చేసింది. దీనిపై త‌న‌ను అరెస్ట్ చేయ‌కుండా కాపాడాలంటూ ఆ భ‌ర్త పంజాబ్‌, హ‌ర్యానా హైకోర్టుకు వెళ్లగా అక్క‌డ చుక్కెదురవ‌డంతో సుప్రీంకోర్టును ఆశ్ర‌యించాడు. విచార‌ణ సంద‌ర్భంగా చీఫ్ జ‌స్టిస్ ఎస్ఏ బోబ్డేతో కూడిన ధ‌ర్మాస‌నం ఆ భ‌ర్త‌పై తీవ్రంగా మండిప‌డింది. నువ్వేం మ‌నిషివి? త‌న‌ను చంప‌డానికి ప్ర‌య‌త్నించాడ‌ని నీ భార్య చెబుతోంది. మీరు కొట్ట‌డం వ‌ల్ల తన‌కు గ‌ర్భ‌స్రావం అయింద‌ని చెప్పింది. భార్య‌ను క్రికెట్ బ్యాట్‌తో కొడ‌తావా? అని ధ‌ర్మాస‌నం ఆగ్ర‌హం తీవ్ర వ్య‌క్తం చేసింది.