4న భార‌త్ రానున్న మ‌రో మూడు రాఫేల్స్
హైద‌రాబాద్‌: ఫ్రాన్స్ నుంచి 36 రాఫేల్స్ యుద్ధ విమానాల‌ను భార‌త్ కొనుగోలు చేసిన విష‌యం తెలిసిందే. ఇప్ప‌టికే 5 విమానాల‌ను భార‌త్‌కు అంద‌జేసింది. అయితే తాజా ఫ్రాన్స్ నుంచి మ‌రో మూడు రాఫేల్ యుద్ధ విమానాలు ఈనెల 4వ తేదీన భార‌త్ రానున్నాయి. ఈనెల 4వ తేదీన మూడు రాఫేల్ విమానాలు ఫ్రాన్స్‌లోని ఇస్‌ట్రెస్ నుంచి భార‌త్‌లోని జామ్‌న‌గ‌ర్‌కు రానున్నాయి. సుమారు 8 గంట‌ల పాటు నాన్ స్టాప్‌గా యుద్ధ విమానాలు ప్ర‌యాణించ‌నున్నాయి. రాఫేల్ విమానాల‌కు ఫ్రాన్స్ వాయుసేన‌కు చెందిన విమానం ఇంధ‌నం నింప‌నున్న‌ది. తొలుత వ‌చ్చిన 5 రాఫేల్స్‌ను గోల్డెన్ యారోస్‌లో ఇండ‌క్ట్ చేసిన విష‌యం తెలిసిందే. అయితే జూలైలో వ‌చ్చిన విమానాలు అర‌బ్ ఎమిరేట్స్‌లోని అల్ ద‌ఫ్రా ఎయిర్‌బేస్‌లో బ్రేక్ తీసుకున్నాయి. ఈసారి మాత్రం మూడు రాఫేల్స్ ఎటువంటి బ్రేక్ లేకుండా ఇండియా రానున్నాయి.