TS EAMCET Results: ఎంసెట్ ఫలితాలు విడుదల
హైదరాబాద్‌ (CLiC2NEWS): తెలంగాణ ఎంసెట్ ఫలితాలను రాష్ట్ర విద్యాశాఖ మంత్రి సబితా ఇంద్రారెడ్డి విడుదల చేశారు. జెఎన్‌టియుహెచ్‌లో బుధ‌వారం నిర్వ‌హించిన కార్య‌క్ర‌మంలో మంత్రి ఫలితాలను విడుదల చేశారు. ఫలితాలను https://eamcet.tsche.ac.in వెబ్‌సైట్‌లో చూడవచ్చు. ఇంజినీరింగ్, వ్యవసాయ, ఫార్మా కోర్సుల ఎంసెట్ ర్యాంకులను ప్రకటించారు.
రాష్ట్రంలోని ఇంజినీరింగ్, అగ్రికల్చర్‌, ఫార్మసీ కాలేజీల్లో ప్రవేశాల కోసం ఈనెల 4, 5, 6 తేదీల‌లో ఇంజినీరింగ్, 9, 10 తేదీల్లో వ్యవసాయ, ఫార్మా ఎంసెట్ పరీక్షను నిర్వహించారు.
ఈ ఏడాది ఇంజినీరింగ్ ప్రవేశాల కోసం 45 శాతం మార్కుల నిబంధనను ప్రభుత్వం ఎత్తివేసిన విషయం తెలిసిందే.
ఇంజినీరింగ్ ప‌శ్చిమ‌గోదావ‌రి జిల్లాకు చెందిన స‌త్తి కార్తికేయ తొలి ర్యాంకు, క‌డ‌ప జిల్లా రాజంపేట‌కు చెందిన ఫ‌ణీశ్‌కు రెండో ర్యాంకు, హైద‌రాబాద్‌కు చెందిన మ‌హ్మ‌ద్ అబ్దుల్ మూడో ర్యాంకు, న‌ల్ల‌గొండ విద్యార్థి రామ‌స్వామికి 4వ ర్యాంకు, కూక‌ట్‌ప‌ల్లికి చెందిన వెంక‌ట ఆదిత్య‌కు 5వ ర్యాంకు సాధించారు. ఇంజినీరింగ్‌లో 82.08 శాతం మంది విద్యార్థులు ఉత్తీర్ణ‌త సాధించిన‌ట్లు మంత్రి పేర్కొన్నారు.
30 నుంచి కౌన్సెలింగ్
ఇంజినీరింగ్ ప్రవేశాల కౌన్సెలింగ్ మొదటి విడత ఈనెల 30న ప్రారంభమవుతుంది. సర్టిఫికెట్ల వెరిఫికేషన్‌కు ఈనెల 30 నుంచి సెప్టెంబర్‌ 9 వరకు ఆన్‌లైన్‌లో స్లాట్ బుక్‌ చేసుకోవాలని అధికారులు తెలిపారు.
సెప్టెంబర్‌ 4 నుంచి 11 వరకు ధ్రువపత్రాలను పరిశీలిస్తామని, సెప్టెంబర్‌ 4 నుంచి 13 వరకు వెబ్ ఆప్షన్లు నమోదుచేసుకోవాలని వెల్లడించారు. సెప్టెంబర్‌ 15న మొదటి విడత సీట్లను కేటాయిస్తామని చెప్పారు. మిగిలిన సీట్లను బట్టి రెండో విడత కౌన్సెలింగ్ షెడ్యూల్‌ను ప్రకటిస్తారు.
ఇంజినీరింగ్ కౌన్సెలింగ్ ముగిసిన తర్వాత వ్యవసాయ, ఫార్మా కోర్సుల కౌన్సెలింగ్ నిర్వహించనున్నారు.