ద‌ర్శ‌కుడి అవతారం ఎత్తిన కిరాక్ ఆర్పీ

జ‌బ‌ర్థస్త్ కామెడీ షోతో తెలుగు ప్ర‌జ‌ల‌కి సుప‌రిచిత‌మైన క‌మెడియ‌న్ కిరాక్ ఆర్పీ ద‌ర్శ‌కుడిగా మారబోతున్నాడు. శ్రీ ప‌ద్మ‌జ పిక్చ‌ర్స్ బ్యాన‌ర్‌పై కోవూరు అరుణాచ‌లం నిర్మాత‌గా కిరాక్ ఆర్పీ ద‌ర్శ‌క‌త్వంలో తెర‌కెక్కనున్న ప్రొడ‌క్ష‌న్ నెం 1 సినిమా పూజా కార్య‌క్ర‌మాల‌తో ప్రారంభ‌మైంది. జేడీ చక్ర‌వ‌ర్తి, ప్ర‌కాశ్ రాజ్, రావు ర‌మేష్ ప్ర‌ధాన పాత్ర‌ల‌లో ఈ చిత్రాన్ని ఆర్పీ తెర‌కెక్కించ‌నున్నాడు. ప‌ద్మ‌జ పిక్చ‌ర్స్ మూవీ ఆఫీసులో జ‌రిగిన పూజా కార్య‌క్ర‌మానికి వెండితెర‌, బుల్లితెర రంగాల‌కి చెందిన పలువురు పాల్గొని చిత్ర బృందానికి శుభాకాంక్ష‌లు తెలిపారు. ఈ ప్రారంభోత్స‌వంలో పాల్గొన్న వారిలో జె.డి. చ‌క్ర‌వ‌ర్తితో పాటు, మెగా బ్ర‌ద‌ర్ నాగ‌బాబు, జ‌బ‌ర్ధ‌స్త్ కామెడీ షోకి చెందిన ఆర్టిస్టులు ఉన్నారు.
ఈ సంద‌ర్భంగా ద‌ర్శ‌కుడు కిరాక్ ఆర్పీ మాట్లాడుతూ.. ‘‘గ‌త కొన్నేళ్లుగా జ‌బ‌ర్థస్త్ కామెడీ షో ద్వారా న‌న్ను ఆద‌రించిన తెలుగు ప్రేక్ష‌కుల‌కి కృత‌జ్ఞ‌త‌లు. సస్పెన్స్ థ్రిల్ల‌ర్ నేప‌థ్యంగా ఓ ఇంట్రస్టింగ్ స్టోరీ కుద‌ర‌డంతో ద‌ర్శ‌కునిగా ఆడియన్స్ ముందుకి రావ‌డానికి నిశ్చ‌యించుకున్నాను. నా మీద న‌మ్మ‌కంతో నిర్మాత కోవూరు అరుణాచలంగారు సినిమాని నిర్మించ‌డానికి ముందుకొచ్చారు. ప‌ద్మ‌జ పిక్చ‌ర్స్ బ్యాన‌ర్‌పై ప్రొడ‌క్ష‌న్ నెంబ‌ర్ 1గా, నా డైర‌క్ష‌న్‌లో తెరెకెక్కుతున్న ఈ సినిమాలో జె.డి. చ‌క్ర‌వ‌ర్తి కీల‌క పాత్ర పోషించ‌‌డానికి అంగీక‌రించ‌డం చాలా ఆనందంగా ఉంది. ’’ అని తెలిపారు.

Leave A Reply

Your email address will not be published.