అక్రమ నల్లా కనెక్షన్లు తీసుకున్న ఇద్ద‌రు యాజ‌మానుల‌పై క్రిమినల్ కేసు
హైద‌రాబాద్‌ (CLiC2NEWS): న‌గ‌రంలోని రెండు ప్రాంతాల్లో అక్రమ నల్లా కనెక్షన్లు క‌లిగి ఉన్న ఇద్ద‌రు వ్య‌క్తుల‌పై, నల్లా కనెక్షన్లు ఇచ్చిన మ‌రో ఇద్ద‌రు వ్య‌క్తుల‌పై పోలీసులు కేసు నమోదు చేశారు. జలమండలి విజిలెన్స్ విభాగం రెండు అక్రమ నల్లా కనెక్షన్లు తొల‌గించింది.
వివ‌రాల్లోకి వెళ్తే… జలమండలి ఓ అండ్ ఎం డివిజ‌న్ – 4, గోడేకిక‌బ‌ర్‌ సెక్షన్ ప‌రిధిలోని గోషామ‌హాల్‌లోని చంద‌న్‌వాడిలో ఇంటి నెం.14-2-462లో నివాసం ఉంటున్న టి.న‌ర్సింగ్ రావు అనే వ్య‌క్తికి గ‌తంలో నల్లా కనెక్షన్ ఉండేది. 31-05-2012న ఈ క‌నెక్ష‌న్‌ను జలమండలి తొల‌గించింది. దీంతో జ‌ల‌మండ‌లికి తెలియ‌కుండా న‌ర్సింగ్‌రావు అక్ర‌మంగా మ‌ళ్లీ 15 ఎంఎం నల్లా క‌నెక్ష‌న్‌ను పున‌రుద్ధ‌రించుకున్నాడు. విష‌యం తెలుసుకున్న జలమండలి విజిలెన్స్ విభాగం ఈ అక్రమ నల్లా క‌నెక్ష‌న్‌ను తొల‌గించింది. యు/ఎస్ 269, 430 ఐపీసీ సెక్ష‌న్ల కింద షాయినాత్‌గంజ్ పోలీసు స్టేష‌న్‌లో న‌ర్సింగ్ రావుపై కేసు న‌మోదైంది.
జలమండలి ఓ అండ్ ఎం డివిజ‌న్ – 5, బోట్స్ క్ల‌బ్ సెక్షన్ ప‌రిధిలోని ముషిరాబాద్‌లో గ‌ల భోల‌క్‌పూర్‌లో ఇంటి నెం.1-4-548/ఏ లో నివ‌సించే ఏ.రెహ‌మాన్ త‌న ఇంటికి అక్ర‌మంగా 15 ఎంఎం నల్లా కనెక్షన్ పెట్టుకున్నాడు. విష‌యం తెలుసుకున్న జలమండలి విజిలెన్స్ విభాగం అక్రమ నల్లా క‌నెక్ష‌న్‌ను తొల‌గించింది. అత‌డిపై ముషిరాబాద్ పోలీస్ స్టేష‌న్‌లో యు/ఎస్ 268, 430, 379 ఐపీసీ, పీడీపీపీ చ‌ట్టం ప్ర‌కారం కేసు నమోదు చేసింది. రెహ‌మాన్ ఇంటికి అక్ర‌మంగా నల్లా కనెక్షన్ ఇచ్చిన బి.వెంక‌న్న అనే వ్య‌క్తితో పాటు అత‌డికి స‌హాయం చేసిన మ‌రో వ్య‌క్తిపై కూడా కేసు న‌మోదైంది.
అధికారుల అనుమతులు లేకుండా అక్రమ నల్లా కనెక్షన్లు తీసుకుంటే క్రిమినల్ కేసులు నమోదు చేస్తామని జలమండలి అధికారులు ఈ సందర్భంగా హెచ్చరించారు. అక్ర‌మంగా నల్లా కనెక్షన్లు తీసుకునే యాజ‌మానితో పాటు క‌నెక్ష‌న్‌కు స‌హ‌క‌రించిన ప్లంబ‌ర్‌, ఇత‌ర వ్య‌క్తుల‌పై కూడా క్రిమినల్ కేసులు నమోదు చేస్తామని తెలిపారు. ఎవరైనా అక్రమ నల్లా కనెక్షన్లు గుర్తించిన, డొమెస్టిక్ కనెక్షన్ తీసుకుని కమర్షియల్ అవసరాలకు వినియోగిస్తున్న వారిని గుర్తించినట్లయితే జలమండలి విజిలెన్స్ బృందానికి లేదా 9989998100, 9989992268 నెంబర్లకు ఫోన్ ద్వారా సమాచారం ఇవ్వగలరు.