చేవెళ్లలో బోర్‌వెల్‌ను ఢీకొన్న ఇన్నోవా: ఏడుగురి మృతి
చేవెళ్ల: రంగారెడ్డి జిల్లా చేవెళ్లలో ఘోర రోడ్డు ప్రమాదం సంభవించింది. హైదరాబాద్‌-బీజాపూర్‌ రహదారిపై ఇవాళ (బుధ‌వారం) ఉదయం ఇన్నోవా కారు ఓ బోర్‌వెల్‌ను ఢీకొట్టింది. ఈ ఘ‌ట‌న‌లో చిన్నారి స‌హా ఏడుగురు మరణించగా, నలుగురు తీవ్రంగా గాయపడ్డారు. చేవేళ్ల సిఐ బాల‌కృష్ణ తెలిపిన వివ‌రాల మేర‌కు.. హైద‌రాబాద్‌‌లోని తాడ్‌బండ్ ప్రాంతానికి చెందిన ఒకే కుటుంబంలోని 11 మంది (ఇద్ద‌రు చిన్నారులు స‌హా) క‌ర్ణాట‌క రాష్ట్రంలోని గుర్మిత్‌క‌ల్‌కు తెల్ల‌వారు జామున బ‌య‌ల్దేరారు.
ఇన్నోవా కారు చేవెళ్ల మండలం కందవాడ-మల్కాపూర్‌ శివారులోని మూలమలుపు వద్ద ఎదురుగా వస్తున్న బోర్‌వెల్‌ను ఢీకొట్టింది. ఈ ఘ‌ట‌న‌లో ఓ చిన్నారి స‌హా ఆరుగురు ఘ‌ట‌నా స్థ‌లంలోనే మృతి చెందారు. మ‌రొక‌రు చికిత్స పొందుతూ మృతి చెందారు. మృతులు ఆసిఫ్ఖాన్ (50), సానియా (18), న‌జియా బేగం (45), హ‌ర్ష (28), న‌జియా భాను (36), హ‌ర్ష భాను (6), ఖ‌లీద్ (43)గా గుర్తించారు. కరీనా బేగం, ఆయూమ్ ఖాన్‌, నిజార్ బేగ్‌, అన్వ‌ర్ ఖాన్‌ల‌కు తీవ్ర గాయాల‌య్యాయి. ప్రమాద ఘటనపై పోలీసులు కేసు నమోదు చేశారు.
