రాష్ట్రంలో రెడ్క్రాస్ సభ్యత్వ నమోదులో కామారెడ్డి జిల్లాకు రెండో స్థానం
కామారెడ్డి (CLiC2NEWS): కామారెడ్డి జిల్లా.. రెడ్క్రాస్ సభ్యత్వ నమోదు కార్యక్రమంలో తెలంగాణ రాష్ట్రంలో రెండో అత్యధిక సభ్యత్వ నమోదును సాధించింది. ఈ సందర్భంగా నిర్వహించిన కార్యక్రమంలో రాష్ట్ర గవర్నర్ చేతుల మీదుగా కామారెడ్డి జిల్లా ప్రతినిధులకు అభినందనలు, ప్రశంసలు అందాయి. రాష్ట్ర గవర్నర్ కార్యదర్శి, పంచాయతీరాజ్, గ్రామీణాభివృద్ధి శాఖ ప్రత్యేక ప్రధాన కార్యదర్శి దానకిశోర్ పాల్గొన్నారు.
కామారెడ్డి జిల్లాలో రెడ్క్రాస్ సభ్యత్వ నమోదును విజయవంతంగా నిర్వహించడంలో జిల్లా అధికారులు, సిబ్బంది, సంబంధిత శాఖల అధికారులు, వివిధ సంస్థలు, ప్రజాప్రతినిధులు ఇతర భాగస్వాములు సమన్వయంతో కృషి చేశారు. ఈ సందర్భంగా జిల్లా అధికారుల సమిష్టి కృషి, సేవా స్ఫూర్తి, మానవతా దృక్పథం ప్రశంసనీయమని అధికారులు పేర్కొన్నారు. రెడ్క్రాస్ సంస్థ సేవా కార్యక్రమాలను మరింత విస్తృతం చేయడంతో పాటు, వచ్చే ఏడాది రాష్ట్రంలో మొదటి స్థానాన్ని సాధించే దిశగా మరింత ఉత్సాహంతో పనిచేయాలని ఆకాంక్షించారు. పంచాయతీరాజ్ శాఖ ప్రధాన కార్యదర్శి దాన కిషోర్ చేతుల మీదుగా ప్రశంసా పత్రాన్ని కలెక్టర్ ఆశిష్ సాంగ్వాన్ అందుకున్నారు. కామారెడ్డి జిల్లాకు ఈ గుర్తింపు రావడానికి కృషి చేసిన ప్రతి అధికారి, సిబ్బంది, సభ్యుడు, భాగస్వామికి జిల్లా యంత్రాంగం తరఫున కృతజ్ఞతలు తెలియజేశారు.