భార్య న‌గ్న‌వీడియోలతో భర్త వ్యాపారం
ద‌ర్యాప్తులో విస్తుపోయే అంశాలు వెలుగులోకి...
గుంటూరు: మోసం చేసి పెళ్లి చేసుకుని… రూపాయి సంపాదించ‌డం చేత‌కాక… క‌ట్టుకున్న భార్య న‌గ్న వీడియోలు, ఫొటోలతో డబ్బులు సంపాదించాలని చూస్తున్నాడు ఓ నీచుడు. అంత‌టితో ఆగ‌కుండా పరాయి పురుషుల వద్దకు వెళ్లమని ఒత్తిడి తెస్తున్నాడు. దీనిని భరించలేని ఆ భార్య దిశ పోలీస్‌స్టేషన్‌ను ఆశ్రయించింది. విచారణలో విస్తుపోయే విషయాలు వెలుగులోకి వస్తున్నాయి. గుంటూరుకు చెందిన ఓ యువకుడు తాను ఎయిర్‌ఫోర్సులో ఉద్యోగినంటూ ఓ యువతిని నమ్మించి కట్నకానుకలతో మూడేళ్ల క్రితం వివాహం చేసుకున్నాడు. వివాహమైనప్పటి నుండి తనకు ఎయిర్‌పోర్టు, విమానాలు చూపించాలని భార్య పట్టుపట్టేది. ఈ క్రమంలోనే భర్త ఉద్యోగం చేయట్లేదని తెలిసి నిర్ఘాంతపోయింది. జల్సాలకు అలవాటు పడ్డ అతను కొరియర్‌ సంస్థను పెట్టి కూడా నష్టపోయాడు. అప్పటి నుండి సులువుగా డబ్బు సంపాదించడానికి పథకాలు వేస్తున్నాడు. ఈనేపథ్యంలో తన భార్యను పరాయి పురుషుల వద్దకు వెళ్లాలని ఆమెపై ఒత్తిడి చేశాడు. తాను చెప్పింది చేయకపోతే చనిపోతానంటూ బెదిరించసాగాడు. దీంతో కంగుతిన్న భార్య తీవ్ర ఆవేదనతో దిశా పోలీస్‌స్టేషన్‌ను ఆశ్రయించింది. తొలుత భర్తను తీవ్రంగా వేధిస్తున్నాడని చెప్పిందే తప్ప మిగిలిన విషయాలు చెప్పడానికి సంకోచించింది. విషయం తెలుసుకున్న గుంటూరు అర్బన్‌ ఎస్పీ అమ్మిరెడ్డి ప్రత్యేక దర్యాప్తు చేయాలని డీఎస్పీ సుప్రజను ఆదేశించారు. డీఎస్పీ ఆమెను ఓదార్చి.. అండగా ఉంటామని హామీ ఇచ్చారు. దీంతో ఆ బాధితురాలు అసలు విషయం చెప్పింది. పరాయి వ్యక్తి వద్దకు వెళ్లి డబ్బులు సంపాదించాలని భర్త బెదిరిస్తున్నాడని రోదించింది. దీంతో డీఎస్పీ ఆమె భర్తను పిలిపించారు. కొంతకాలంగా తన భార్యకు తెలియకుండా ఆమె నిద్రపోతున్నప్పుడు నగ ఫొటోలు తీసి యూట్యూబ్‌లో అప్‌లోడ్‌ చేసేవాడని, ఎక్కువ మంది ఆ వీడియోలు చూస్తే డబ్బులు వస్తాయని పోలీసులకు చెప్పినట్లు సమాచారం. అంతేకాకుండా ఏకాంతంగా గడిపిన వీడియోలను కూడా కొత్త యాప్‌లో పెట్టి లైవ్‌ల ద్వారా భర్త తన బ్యాంకు ఖాతాకు నగదు జమ చేయించుకునేవాడని తెలిపింది. అలా యూట్యూబ్‌, యాప్‌లలో లైవ్‌ల ద్వారా సంప్రదించిన వారి వద్దకు ఆమెను పంపించి పెద్దమొత్తంలో డబ్బులు సంపాదించాలనే నికృష్టపు ఆలోచన చేసినట్లు పోలీసులకు తెలిసింది. ఈ క్రమంలోనే కొన్నిరోజులుగా భార్యపై తీవ్ర ఒత్తిడి తెస్తున్నాడు. ఈ దారుణాన్ని భరించలేని ఆమె పోలీసులను ఆశ్రయించింది. దీంతో ఎస్పీ ప్రత్యేక చొరవ తీసుకుని సైబర్‌ నిపుణులను రంగంలోకి దించారు. అంతర్జాలంలో పెట్టిన ఫొటోలు, వీడియోలు తొలగించేందుకు ప్రయత్నాలు చేస్తున్నట్లు సమాచారం. సాంకేతిక ఆధారాలతో నిందితుడిపై చర్యలు తీసుకోవాలనే యోచనలో ఉన్నట్లు ఎస్పీ తెలిపారు. విచారణ అనంతరం వివరాలు వెల్లడిస్తామన్నారు.